Fragment

Dit is een gedeelte uit de eerste rechtszitting:

#Constitutio#
Item Jasper van Gent, als momber der drie onmundige kijnderen zaliger Walraevens van Gent etc. ende jonffrou Elisabeth van Raesvelt weduwe obgenanten Walraevens, hefft voir den amptman Clais Vijgh gerichtelicken mechtich gemackt meister Peter Huet, Johan van der Hoeve, Guert van Hoemen, Johan van Kell, Wilhem van Gent unnd Gisbert Gerlichsen sampt unnd een ijder besunder te doen unnd laeten wes die vurschreven saeckwolder deser tijt aen den gherichte toe Kesteren te doen hebben off kriegen moegen, niet dairvan uuijtgescheiden. Gerichtzluijdenn Herman Pieck, Heren tot Isendoren, unnd Heijmerick van Bemmel. Actum den XXIIIIen aprilis.

#Constitutio#
Item Thonis van Hattem hefft gerichtelicken mechtich gemackt Derick ... in alles hij in Nederbettouwen te doen hefft, sub communi stilo, te wijnnenn unnd te verliesen. Gerichtzluijden Gisbert Spruijt unnd Gurt Wilhemsen. Actum den XIXen maii.

Aenspraeck.
#Cornelis Fortter#
Gisbert Gerlichsen, volmechtich van Cornelis Fortter, sprickt aen mit recht tusschen besaetinge unnd weder ontsaetinge Bartolt van Heteren als voir vijfftich gulden, die hij eijsscher dairbij toe schaedenn kompt, alsdat den verwerder van den eijsscher ontholt eenen schultbrieff die betaelt is unnd hij gedaechden off verwerder, hoewel hij betaelt is, niet en will laeten cassieren unnd te niet doen. Welcke brieff Frans van Sweeten unnd Costen Dericksen als principaell versegelt hebben unnd den eijsscher alhier mit Jan van Drueten unnd hij verwerder als burge hebben. Inhaldende den vurschreven brieff hoefftsom anderhalff hondert gulden unnd des toe betaelen aen handen Jan Janssen van Mechelen. Niettegenstaende hefft den verwerder, soe hij burch mede geworden is, breder inhalt der brieven, den brieff gekofft unnd 't recht van Jan Janssen van Mechelen op hem genoemen. Hefft nae dien tijt begeven, alsdat den verwerder den hefft willen peijnden unnd Jan van Drueten om aen sijn affterwesen toe koemen moegen. Niettegenstaende is den verwerder betaelt unnd voldaen van den eijsscher ende Jan van Drueten, mitz betaelt sijnde, hefft den verwerder beloefft den brieff in questie d' eisscher wederomb te leveren unnd te cassieren, mitz bedanckende betaelonge van dien, is hij verwerder in gebreck van leverijnge van den brieff in questie. Kompt dairomme te schaede d' eijsscher vijfftich keijsersgulden ende den onraet mit recht. Concludiert dairomb den eijsscher, dat bij den edelen heren ridderen unnd knechten verklairt unnd gewesen sall worden, alsdat den verwerder den brieff in questie, soe hem verwerder den brieff betaelt is, te cassieren unnd te niet te doen, off bij gebreck van dien gecondemniert te worden in die somme van vijfftich gulden unnd den onraet mit recht, ende gesijnt een recht antwoirt, d' eijsscher sijn vorder noitdurfft soe recht.

#Ritterschap toe raide versamelt#
Item op maenendach den XXIIen maii waren tot Kesteren in der kercken versaemelt ritterschap van Nederbettouwen, te weten Herman Pieck, Heren tot Isendoren, Jasper van Wijhe, Mathijs van Beijnhum, Baltasar van Bemmell, Gerrit Ingen Nulant, Joachim van Hoemen, Wilhem van Poelwick, Lodewick van Montfoirt, Peter Foiart, Ott van Haefften, Jan van Eck, Jan Ruijs, Alert van Isendoren, Herman van Leuwen, Gerrit van Eck mit meer anderen.

#Affdoenongh#
Item wiest Gerrit van Eck mit gefollich ritter unnd knecht tusschen dingtaell Reier Ariëntzsen mit Udo Ariëntzsen aenclegeren eens unnd des affgestorven Reier Peterssen, geweest volmechtich van den edelen unnd waelgeboeren heren Wilhem graeve toe den Berge etc., oeck sijn gebruderen unnd susteren verwerderen anderdeels, dat waelgedachten graeffs sampt derselver bruder unnd susteren, off derselver graeffs volmechtiger, mit obgenanten aenclegeren bijnnen twee maenden nae datum van desenn opter walstat des wertz bij der aenspraecken aengetoegen geboirlicke raedonge gehalden sullen sijn te doen tot bequemener gelegentheit ende erkentenisse deses gerichtz. Unnd dat derhalven itzgeroirtte eijsschers tot breide hoerer althovige lantz rechte inleidonge unnd die verwerder onrechte uuijtleidonge gedaen hebbenn unnd dit ter tijt unnd derwielen toe ritter unnd knecht beter bescheit saegen dan sij alnoch gesien off gehoirt hebben.

#Affdoenongh#
Item wiest Ariën van Leuwen voir recht mit gefollich ritter unnd knecht tusschen dingtaell des erentfesten unnd vroehmen Clais Viegh, amptman in Nederbettouwen in stat Conincklicken Majesteit toe Hispaniën etc., onsers allergenedigsten heren, als Hertoch vann Gelre unnd Greeff van Sutphen, aencleger eens ende Rijck van der Steech verwerder anderdeels, dat Rijck vurschreven ghehalden sall sijn den toegevulden graeff in der aenspraecken aengetoegen wederomb op te graeven, gelick hij van bevorens was, tot gesijnnen des amptmans vurschreven unnd tot erkentenisse der heijmraeden, unnd sall van die broecken van dien vrij sijn, voirbehalden wanneer obgemelten amptman bewiest dat Rick van der Steech denselven graeff toegevult hefft off doen toevullen, soe sall hij die broecken opleggen unnd betaelen tot erkentenisse des gerichtz. Unnd dit ter tijt unnd derwielen toe etc.

#Verdrach#
Item terselver tijt is verdraegen bij die semptelicke ritterschap tot Kesteren, dat die amptman Clais Viegh unnd alle andere onschuldige vrunden tot honnen kosten in vrede leggen sall van den doetslach, die Jasper Henricksen aen Reijer Peterssen begaen hefft, ter tijt toe Henrick Jaspers unnd den anderen onschuldige vrunden vurschreven nae lantrecht in den doetslach vurschreven gelacht worden. ×